میڈیکل اینڈ ڈینٹل کالج کے داخلہ ٹیسٹ (MDCAT) میں تیسری کوشش میں ناکام ہونے کے بعد اسلامیہ کالج پشاور کے طالب علم نے خود کشی کر لی۔

تفصیلات کے مطابق پاراچنار سے تعلق رکھنے والا طالب علم اسلامیہ کالج پشاور میں زولوجی کی تعلیم حاصل کر رہا تھا۔ واضح رہے کہ ایم ڈی سی اے ٹی کا امتحان اتوار کو کے پی کے میں دوسری بار منعقد ہوا تھا جب اس سے قبل ہونے والے ٹیسٹ میں متعدد طلبہ دھوکہ دہی کرتے ہوئے پکڑے گئے تھے۔

متوفی طالب علم نے مبینہ طور پر 27 نومبر کو اپنی تیسری کوشش میں میڈیکل کالج کے داخلہ ٹیسٹ میں ناکام ہونے کے بعد ایلومینیم فاسفائیڈ نگل لیا تھا۔

کالج کے پرووسٹ کے مطابق، متوفی کے روم میٹ نے اسے کمرے میں تشویشناک حالت میں دیکھ کر وارڈن کو اطلاع دی۔ تاہم ڈاکٹروں کی جانب سے جان بچانے کی کوشش کے باوجود وہ منگل کی صبح خیبر ٹیچنگ ہسپتال میں دم توڑ گیا۔ متوفی کے والد نے بتایا کہ ان کے بیٹے نے تیسری کوشش میں بھی ٹیسٹ پاس نہ کرنے پر اپنی جان لے لی۔